Алайдын Нура айылына заманбап логистикалык борбор курулат
Ош облусунун Алай районундагы Нура айылында Кыргызстандын энергетика жана логистика тармагындагы ири стратегиялык долбоордун башталышына арналган мезгил кутусун салуу аземи болду.
Маалыматка ылайык, иш-чарага Энергетика министринин орун басары Салават Садыракунов жеринде катышып, долбоордун ишке киришине расмий старт берди. Бул демилге өлкөнүн экспорттук жана логистикалык мүмкүнчүлүктөрүн кеңейтүүгө багытталган эң ири инфраструктуралык кадамдардын бири болуп саналат.
Долбоор Энергетика министрлигине караштуу “Кыргызкөмүр” ААК менен Кытай Эл Республикасынын Xinjiang Dacheng Yuanlong Technology Co., Ltd ортосундагы стратегиялык өнөктөштүктүн негизинде ишке ашырылууда. Жалпы инвестиция көлөмү 430 миллион долларды түзүп, бул долбоор көмүр тармагындагы логистикалык инфраструктураны түп-тамырынан модернизациялоого багытталган ири программа катары бааланууда.
Долбоордун негизги максаты Текелик көмүр кени аймагынан казылып алынган көмүрдү Эркештам өткөрмө пункту аркылуу экспортко чыгарууну заманбап логистикалык система менен камсыз кылуу, ташуу чыгымдарын кыскартуу жана Кыргызстандын тышкы рыноктогу атаандаштык жөндөмүн жогорулатуу болуп саналат.
Муну менен катар Нура айылында 10 гектар аянтта заманбап логистикалык борбор курулуп, анын курамында көмүрдү байытуучу эки фабрика жана көмүр ташуучу ленталуу конвейер системасы ишке берилет. Долбоор толук ишке ашкандан кийин 100дөн ашык туруктуу жумуш орун түзүлүп, аймактын социалдык-экономикалык өнүгүүсүнө олуттуу салым кошот.
