Чүй облусундагы өнөр жай аймагына ири инвестициялар тартылууда
Президенттин Администрациясында Президенттин өзгөчө тапшырмалар боюнча атайын өкүлү Бакыт Төрөбаевдин жетекчилиги алдында өнөр жай аймактары жана индустриалдык парктар боюнча жыйын өттү.
Жыйындын жүрүшүндө өлкө аймагындагы өнөр жай аймактарын жана индустриалдык парктарды өнүктүрүү, алардын натыйжалуулугун жогорулатуу, инфраструктуралык даярдыгын камсыз кылуу жана инвестицияларды тартуу маселелери каралды.
Өзгөчө көңүл Чүй облусунда түзүлүп жаткан өнөр жай аймагынын калыптануу процессине бурулуп, аталган аймакта инвесторлор тарабынан пландалып жаткан жана ишке ашырылуучу инвестициялык долбоорлор боюнча кеңири маалымат берилди.
Жыйынга бизнес-коомчулуктун өкүлдөрү жана өнөр жай аймагында долбоорлорду ишке ашырып жаткан инвесторлор катышты. Алар долбоорлорду жүзөгө ашырууда жаралган көйгөйлөрдү, анын ичинде инфраструктуралык камсыздоо жана мамлекеттик органдар менен ресурс берүүчү мекемелердин ортосундагы координация маселелерин көтөрүштү.
Талкуунун жыйынтыгында тиешелүү мамлекеттик органдарга өнөр жай аймагынын мындан аркы өнүгүүсүнө байланышкан маселелерди ыкчам чечүү боюнча бир катар тапшырмалар берилди.
