Кант шаарынын бюджетинен 65 млн сомдон ашык финансылык бузуу аныкталды

Кыргыз Республикасынын Эсептөө палатасы Чүй облусунун Кант шаарынын 2024-жылдагы бюджетинин түзүлүшүнө жана аткарылышына аудит жүргүзүп, 65,3 млн сомдук финансылык бузууларды жана кемчиликтерди аныктады.

Эсептөө палатасынан маалыматына ылайык, аудит 2024-жылдын 1-январынан 31-декабрына чейинки мезгилди камтып, Кант шаарынын мэриясынын бюджетинин аткарылышын, ошондой эле “Эмгек Люкс” жана “Кант-Жылуулук” муниципалдык ишканаларынын ишмердүүлүгүн текшерген.

Текшерүүнүн жыйынтыгында жалпы 65 млн 315 миң сом өлчөмүндө финансылык бузуулар аныкталып, анын ичинен 60 млн 142 миң сомду калыбына келтирүү зарылдыгы белгиленди.

Негизги мыйзам бузуулар төмөнкүлөр болгон:

·       Бюджеттик мыйзамдын талаптарына бюджет долбоорунун киреше бөлүгүнүн туура келбеши -   1 032,1 миң сом;

·       бюджеттик ассигнованиелерди жана каржылоо лимиттерин укуктук негизсиз өзгөрүшү - 60 142,5 миң сом;

·       кызматкерлердин эмгек акысы жана башка төлөмдөр боюнча ченемден ашык чыгымдар — 4 143,2 миң сом.

Аудиттин жыйынтыгы Эсептөө палатасынын аймактык бөлүмүнүн коллегиясында каралып, тиешелүү маалыматтар Чүй облусундагы президенттин өкүлчүлүгүнө жана Кант шаарынын мэриясына жөнөтүлгөн.

Ошондой эле Кант мэриясына аныкталган мыйзам бузууларды жоюу жана мындан ары мындай учурларга жол бербөө боюнча жазма буйруктар берилген. Мэриянын жетекчилигине аудиттин жыйынтыктарын коллегиялык жыйында карап чыгып, көзөмөлдү күчөтүү сунушталды.