Бишкекте кыргыз-түрк бизнес форумуна байланыштуу жолугушуу өттү
Күн мурун Экономика жана коммерция министрлигинде министрдин орун басары Султан Ахматов Түркия Республикасынын Низип муниципалитетинин башчысы Али Доган жетектеген делегация менен жолугушту. Бул тууралуу ведомстводон билдиришти.
Жолугушуунун жүрүшүндө тараптар 2026-жылдын 30-августунда өтө турган кыргыз-түрк бизнес форумуна даярдык көрүү маселелерин талкуулашты. Ошондой эле эки өлкөнүн ишкерлеринин ортосунда түз байланыштарды өнүктүрүү жана биргелешкен инвестициялык долбоорлорду ишке ашыруу боюнча пикир алышуу болду.
Тараптар кайра жаралуучу энергия, агроөнөр жай комплекси, кайра иштетүү тармагы, логистика жана туризм багыттарындагы кызматташтык мүмкүнчүлүктөрүнө өзгөчө көңүл бурушту.
Мындан тышкары, жолугушууда Нарын жана Низип шаарларынын ортосундагы өнөктөштүктү экономикалык долбоорлор аркылуу чыңдоо маанилүү экени белгиленди.
Тараптар кыргыз-түрк экономикалык кызматташтыгын мындан ары кеңейтүүгө жана ишкер чөйрөлөр ортосундагы алакаларды активдештирүүгө кызыкдар экенин билдиришти.
