Кыргызстан менен Өзбекстан текстиль тармагында кызматташат
Кыргызстандын Өзбекстандагы Соода өкүлчүлүгү текстиль тармагындагы ата мекендик өндүрүүчүлөр үчүн соода миссиясын уюштуруу алкагында Өзбекстандын Жеңил өнөр жайын өнүктүрүү агенттиги менен жолугушуу өткөрдү. Бул тууралуу Экономика министрлигинин басма сөз кызматы билдирди.
Маалыматка ылайык, тараптар байердик программаларды уюштуруу, текстиль ишканаларына бизнес-экскурсияларды өткөрүү жана эки өлкөнүн ишкерлеринин ортосунда B2B жолугушууларын уюштуруу маселелерин талкуулашты.
Ошондой эле өндүрүштүк кооперацияны өнүктүрүү, тажрыйба алмашуу жана текстиль продукциясын өндүрүү, кайра иштетүү жана экспорттоо боюнча заманбап ыкмаларды өздөштүрүү маселелерине өзгөчө көңүл бурулду.
Жолугушуунун жыйынтыгында тараптар кызматташтыкты мындан ары чыңдоого кызыкдар экендиктерин билдиришти.
