Кыргызстандын тышкы жана өз ара соода жүгүртүүсү 2026-жылдын башында 4%га кыскарган
2026-жылдын январь-март айларында Кыргыз Республикасынын тышкы жана өз ара соода жүгүртүүсүнүн көлөмү 3 млрд 356,2 млн долларды түздү. Бул көрсөткүч 2025-жылдын ушул мезгилине салыштырмалуу 4 пайызга азайган. Өткөн жылы соода жүгүртүүнүн көлөмү 3 млрд 497,5 млн доллар болгон.
Статистикалык комитеттин маалыматына ылайык, экспорттун көлөмү да төмөндөп, отчеттук мезгилде 482,9 млн долларды түздү. Бул өткөн жылдын ушул мезгилине салыштырмалуу 86,6 пайыз деңгээлин көрсөттү. Ал эми 2025-жылдын январь-март айларында экспорт 558,1 млн доллар болгон.
Импорттун көлөмү 2 млрд 873,2 млн долларды түзүп, өткөн жылга салыштырмалуу 2,3 пайызга кыскарган. Былтыркы ушул мезгилде импорттун көлөмү 2 млрд 939,4 млн долларды түзгөн.
Аймактар боюнча алганда, эң ири тышкы жана өз ара соода жүгүртүү Чүй облусунда катталган. Отчеттук мезгилде аталган аймактагы сооданын көлөмү 368,7 млн долларды түзүп, жалпы көлөмдүн 31,1 пайызын камсыздаган. Былтыр бул көрсөткүч 404,9 млн доллар болгон.
Улуттук статистикалык маалыматтар - Евразия экономикалык биримдигине мүчө мамлекеттер менен болгон өз ара соода боюнча атайын статистикалык отчеттордун негизинде түзүлөт. Ошондой эле Кыргызстандын Казакстан менен мамлекеттик чек арасындагы өткөрүү пункттарында жүргүзүлгөн тандалма байкоолордун жыйынтыктары дагы эске алынат.
