Караколдо 5 млн долларлык эл аралык мейманкана комплекси курулат
Бүгүн Каракол шаарында “Relax-Inn” эл аралык инновациялык мейманкана комплексин куруу боюнча үч тараптуу макулдашууга кол коюлду. Бул тууралуу Инвестициялар боюнча улуттук агенттигинен билдиришти.
Долбоор Инвестициялар боюнча улуттук агенттик, “Ысык-Көл” бирдиктүү башкаруучу компаниясы” мамлекеттик ишканасы жана “Кедра” ЖЧКсы тарабынан ишке ашырылат.
Маалыматка ылайык, мейманкана комплекси заманбап санариптик жана энергияны үнөмдөөчү технологиялар менен курулат. Долбоордун жалпы инвестициялык көлөмү болжол менен 5 млн АКШ долларын түзүп, каражат толугу менен жеке өнөктөш тарабынан каржыланат.
Долбоордун алкагында 100–200 орундуу мейманкана, ден соолукту чыңдоочу жана коомдук жайлар курулат. Ошондой эле жаңы жумуш орундарын түзүү жана Каракол шаарында кризистик борбор салып, аны кийин мамлекетке акысыз өткөрүп берүү пландалууда.
Инвестициялар боюнча улуттук агенттиктин башчысы Равшанбек Сабиров бул долбоор Ысык-Көлдүн туристтик потенциалын жогорулатууга жана аймакка кошумча инвестиция тартууга өбөлгө түзөрүн белгиледи.
