Кыргызстан менен Беларусь соода жүгүртүүнү 500 млн долларга жеткирүүнү пландоодо
Жогорку Кеңештин Төрагасы Марлен Маматалиев Санкт-Петербург шаарында өткөн КМШ Парламенттер аралык ассамблеясынын иш-чараларынын алкагында Беларусь Республикасынын Улуттук жыйынынын Республикалык кеңешинин Төрайымы Наталья Кочанова менен жолугушту. Бул тууралуу ЖКнын Басма сөз кызматынан билдиришти.
Жолугушууда тараптар парламенттер аралык кызматташтыкты чыңдоо, мыйзам чыгаруу жаатында тажрыйба алмашуу жана эки өлкөнүн ортосундагы соода-экономикалык байланыштарды өнүктүрүү маселелерин талкуулашты.
Марлен Маматалиев акыркы жылдары кыргыз-беларусь мамилелери жигердүү өнүгүп жатканын белгилеп, парламенттер аралык кызматташтыкты кеңейтүүгө даяр экенин билдирди. Ошондой эле ал парламентти санариптештирүү боюнча жүргүзүлүп жаткан реформалар тууралуу айтып, тажрыйба бөлүшүүгө кызыкдар экенин кошумчалады.
Мындан тышкары, Төрага Беларусь онкология жана органдарды трансплантациялоо тармагында чоң тажрыйбага ээ экенин белгилеп, өзгөчө муктаж болгон кыргызстандыктарды акысыз дарылоо үчүн квота бөлүү мүмкүнчүлүгүн кароону сунуштады.
Жолугушууда Кыргызстан менен Беларусь ортосундагы соода жүгүртүүнү 2030-жылга чейин 500 млн долларга жеткирүү максаты да сөз болду.
Өз кезегинде Наталья Кочанова кыргыз-беларусь кызматташтыгы жаңы деңгээлге чыкканын белгилеп, парламенттер аралык байланышты мындан ары да бекемдөөгө кызыкдар экенин билдирди. Ал ошондой эле Марлен Маматалиевди Беларусь Республикасына расмий сапар менен келүүгө чакырды.
