Кыргызстан сунуштаган тарифтик жеңилдик ЕАЭБде колдоо тапты
20-майда видеоконференция форматында өткөн Евразия экономикалык комиссиясынын Кеңешинин кезектеги жыйынында 20 маселе каралып, бир катар чечимдер кабыл алынды. Бул тууралуу Экономика жана коммерция министрлигинен билдиришти.
Жыйындын алкагында спорттук тамактанууну милдеттүү маркалоо боюнча товарлардын тизмеси бекитилип, стерилдүү продукцияны өндүрүүгө коюлган талаптар күчөтүлдү. Ошондой эле ЕАЭБге импорттолгон товарларды көзөмөлдөө механизми жана баалуу кагаздар рыногундагы дилерлерге карата талаптарды шайкеш келтирүү маселелери талкууланды.
Мындан тышкары, “Алкоголдук продукциянын коопсуздугу жөнүндө” техникалык регламенттин күчүнө кирүү мөөнөтү 2026-жылдын 1-декабрына жылдырылды.
Жыйындын жүрүшүндө Кыргызстандын демилгеси менен какао порошогуна жана курамында какаосу бар айрым азыктарга 2026-жылдын аягына чейин импорттук бажы алымынан бошотуу чечими кабыл алынды.
Ошондой эле ШКУ саммитин жана VI Дүйнөлүк көчмөндөр оюндарын өткөрүүгө байланыштуу Кыргызстанга ташылып келүүчү товарлардын тизмесине өзгөртүүлөр киргизилди.
Белгилей кетсек, 28-29-май күндөрү Астана шаарында V Евразиялык экономикалык форум өтөт. Анын негизги темасы “ЕАЭБ глобалдык санариптик жарышта: жасалма интеллектке басым” деп белгиленди.
