Париждеги WOAH жыйынында Кыргызстандын экспорттук мүмкүнчүлүктөрү талкууланды
18-22-май күндөрү Кыргызстандын делегациясы Париж шаарында өткөн Бүткүл дүйнөлүк жаныбарлардын саламаттыгын сактоо уюмунун (WOAH) Делегаттарынын Ассамблеясынын 93-Башкы сессиясына катышты.
Кыргыз делегациясын Суу ресурстары, айыл чарба жана кайра иштетүү өнөр жайы министрлигине караштуу Ветеринария, мал чарбасын өнүктүрүү, жайыт жана тоют кызматынын директору Адилет Сотовалдиев жетектеди.
Министрликтин маалыматына ылайык, иш-чарага дүйнөнүн 183 өлкөсүнөн ветеринардык кызматтардын жана эл аралык уюмдардын өкүлдөрү катышып, жаныбарлардын саламаттыгы, биологиялык коопсуздук жана ветеринардык системаларды өнүктүрүү маселелерин талкуулашты.
Быйылкы Башкы сессиянын негизги темасы “Бардыгы үчүн коопсуз келечекти камсыз кылуу максатында жаныбарлардын саламаттыгына жана жыргалчылыгына инвестиция салуу” болду.
Жыйындын жүрүшүндө трансчек аралык ооруларга каршы күрөшүү, эпизоотиялык мониторингди күчөтүү, ветеринардык кызматтарды өнүктүрүү жана тармакка заманбап технологияларды киргизүү маселелерине өзгөчө көңүл бурулду.
Министрликтен белгилешкендей, кыргыз делегациясынын бул иш-чарага катышуусу ветеринария жана биологиялык коопсуздук жаатындагы эл аралык кызматташтыкты кеңейтүүгө, ошондой эле ата мекендик мал чарба продукцияларынын экспорттук мүмкүнчүлүктөрүн жогорулатууга өбөлгө түзөт.
