Кыргызстанда ШКУнун Инвестициялык форумуна кызуу даярдык жүрүүдө
Инвестициялар боюнча улуттук агенттигинин директору Равшанбек Сабиров үстүбүздөгү жылдын 24-25-июнунда өтө турган Шанхай кызматташтык уюмунун (ШКУ) Инвестициялык форумуна даярдык көрүү боюнча кеңешме өткөрдү. Бул тууралуу аталган агенттиктен билдиришти.
Жолугушууга Кыргыз Республикасынын Соода-өнөр жай палатасынын төрагасы Темир Сариев, экономика жана коммерция министринин орун басары Медербек Туманов, ошондой эле мамлекеттик органдардын жана бизнес коомчулугунун өкүлдөрү катышты.
Кеңешменин жүрүшүндө форумду уюштуруу маселелери, эл аралык инвестициялык кызматташууну кеңейтүү, Кыргызстандын инвестициялык жагымдуулугун жогорулатуу жана ШКУнун инвестициялык жана экспорттук мүмкүнчүлүктөрүнүн көргөзмөсүн өткөрүү боюнча маселелер талкууланды.
Равшанбек Сабиров форум Кыргыз Республикасынын инвестициялык потенциалын дүйнөгө таанытуу жана жаңы экономикалык байланыштарды түзүү үчүн маанилүү аянтча болоорун белгиледи.
"ШКУнун Инвестициялык форуму Кыргыз Республикасынын инвестициялык потенциалын таанытуу, эл аралык өнөктөштүктү кеңейтүү жана жаңы экономикалык байланыштарды түзүү үчүн маанилүү аянтча болот", — деди ал.
Катышуучулар алдыдагы форум ШКУга мүчө мамлекеттердин ортосундагы экономикалык кызматташууну чыңдоого, инвестицияларды тартууга жана биргелешкен долбоорлорду ишке ашырууга чоң мүмкүнчүлүк түзөрүн белгилешти.
Ошондой эле иш-чаранын алкагында Соода-өнөр жай палатасынын төрагасы Темир Сариевге өлкөнүн экономикасын өнүктүрүүгө жана инвестициялык потенциалын чыңдоого кошкон салымы үчүн "Инвестициянын мыктысы" сыйлыгы тапшырылды.
Форумдун жыйынтыгында жаңы инвестициялык демилгелерди ишке ашыруу, бизнес кызматташтыкты кеңейтүү жана Кыргызстандын экономикалык мүмкүнчүлүктөрүн эл аралык деңгээлде илгерилетүү боюнча маанилүү кадамдар жасалары күтүлүүдө.
