Кытай инвесторлору Кыргызстанда өндүрүш ишканаларын ачууну пландоодо
Бүгүн Соода-өнөр жай палатасынын президенти Темир Сариев Кытайдын Гуандунь провинциясынан келген делегация менен жолугушту. Бул тууралуу мекеменин басма сөз кызматы маалымдады.
Жолугушууда кытайлык инвесторлор Кыргызстан аймагында бир катар өндүрүш ишканаларын ачууга кызыкдар экенин билдиришти. Алар тигүү тармагы, курулуш материалдарын өндүрүү жана эмерек чыгаруу боюнча долбоорлорду ишке ашырууну пландап жатышат.
Тараптар инвестициялык долбоорлорду ишке ашыруу, өндүрүш объектилерин жайгаштыруу жана инвесторлор үчүн ыңгайлуу шарттарды түзүү маселелерин талкуулашты.
Темир Сариев өндүрүш ишканаларын “Бишкек” эркин экономикалык аймагында, ошондой эле Нарын, Ысык-Көл жана башка облустарда жайгаштыруу мүмкүнчүлүктөрүн кароону сунуштады.
Мындан тышкары, кытайлык делегация Жалал-Абад облусунда мейманкана комплексин куруу боюнча туристтик долбоорду ишке ашырууга да кызыкдар экенин билдирди.
Жолугушуунун жыйынтыгында тараптар кыргыз-кытай экономикалык кызматташтыгынын потенциалы жогору экенин белгилеп, өнөр жай кооперациясын кеңейтүүгө, жаңы жумуш орундарын түзүүгө жана инвестициялык байланыштарды өнүктүрүүгө кызыкдар экендиктерин билдиришти.
