Электрондук аудит системасы текшерүү мөөнөтүн эки жумадан үч күнгө чейин кыскартты
Кыргыз Республикасынын Министрлер Кабинетинин Төрагасы Адылбек Касымалиев Финансы министрлиги тарабынан иштелип чыккан жаңы электрондук аудит системасынын иши менен таанышты. Санариптик платформа мамлекеттик башкаруу системасын бюрократиядан арылтуу программасынын алкагында ишке киргизилген.
Финансы министри Руслан Суйналиев маалымдагандай, IT-платформа 2026-жылдын 1-апрелинен баштап, бюджеттик уюмдарга карата 32 аудит жүргүзүлүп, анын 25и толук аяктады.
Текшерүүлөрдүн жыйынтыгында, 62,5 млн сомдук каржылык мыйзам бузуулар аныкталып, командировкалык чыгымдардан 629 миң сом үнөмдөлгөн. Салыштыруу үчүн, 2024-жылы аныкталган мыйзам бузуулардын көлөмү 13,5 млн сомду түзгөн.
Жаңы системанын негизги артыкчылыгы — аудит жүргүзүү мөөнөтүнүн кескин кыскарышы болду. Мурда бир текшерүү эки жумага чейин созулса, азыр санариптик форматка өтүүнүн эсебинен үч күндөн ашпай калды.
Мындан тышкары, аудиттин бардык этаптары автоматташтырылган. Тактап айтканда, объекттердин тизмесин түзүүдөн тартып текшерүү актысын даярдоого чейинки процесстер “Казына.Бюджет”, “ББУ” маалыматтык системалары жана мамлекеттик сатып алуулар порталы аркылуу жүргүзүлөт.
Адылбек Касымалиев электрондук аудит системасынын жыйынтыгын оң баалап, Финансы министрлигине санариптик көзөмөл инструменттерин кеңейтүүнү тапшырды. Анын айтымында, мамлекеттик аудитти толук автоматташтыруу убакытты жана ресурстарды үнөмдөп гана тим болбостон, ачык-айкын жана отчеттуу башкаруу чөйрөсүн түзүүгө шарт түзөт.
Кыргыз Республикасынын Финансы министрлигинин – «Электрондук аудит» жаңы санариптик системасы министрликтин IT-адистери тарабынан иштелип чыгып, ийгиликтүү сыноодон өткөрүлгөндөн кийин 2026-жылдын 1-апрелинен тартып пилоттук режимде иштеп баштаган.
