Ивановкадагы 40 млн долларлык керамика заводу экономикага кандай салым кошууда?
Финансы министри Руслан Сүйналиев “Ачык кабинет: жоопкерчилик аймагы” медиа долбоорунун алкагында Чүй облусунун Ивановка айылында жайгашкан “Асыл Таш” керамика заводунун ишмердүүлүгү менен таанышты.
Министр белгилегендей, аталган ишкана мамлекет тарабынан колдоого алынган ири өндүрүш долбоорлорунун бири болуп саналат. Финансы министрлиги мамлекеттин атынан кепилдик берип, заводду зарыл каржы ресурстары менен камсыздоого жана аймактагы өнөр жай тармагын өнүктүрүүгө көмөк көрсөткөн.
Руслан Сүйналиевдин маалыматына ылайык, “Мамлекеттик финансылык холдинг” 2023-жылдан тартып жалпы көлөмү 66 млрд сомду түзгөн 26 ири долбоорду каржылаган. Алардын катарында “Асыл Таш” заводу дагы бар. Учурда бул долбоорлордун өлкө экономикасына кошкон жалпы салымы болжол менен 113 млрд сомго жеткен.
Министрдин айтымында, заводдун жалпы долбоордук наркы 40 млн АКШ долларын түзөт. Анын ичинен 25 млн доллар Кыргыз-орус өнүктүрүү фонду тарабынан каржыланган.
Ишкананын директору Кубаныч Рыскелдиев заводдун өндүрүш аянты 25 миң чарчы метрди түзөрүн билдирди. Учурда завод суткасына 8,5 миң чарчы метр даяр продукция чыгарууга жөндөмдүү.
Өндүрүштө колдонулган чийки заттын 70 пайызын ата мекендик материалдар — таш, кум жана топурак түзөт. Калган бөлүгү Россия жана Казакстандан импорттолот. Завод учурда экспорттук багытты да өнүктүрүп, продукциясын ушул эле өлкөлөргө жөнөтүп жатат.
Бүгүнкү күндө ишкана 100дөн ашык түрдөгү керамикалык продукция чыгарат.
Кубаныч Рыскелдиев мамлекеттик органдардын координацияланган колдоосу долбоордун ийгиликтүү ишке ашуусунда чоң роль ойногонун белгиледи.
“Өкмөт долбоорду башынан тартып өндүрүш линияларын ишке киргизүүгө чейинки бардык этаптарда коштоп берди. Көзөмөлдөөчү жана уруксат берүүчү органдар менен тыгыз кызматташуу камсыз болду. Көрсөтүлгөн колдоо үчүн ыраазычылык билдирем”, — деди ал.
