“Кепилдик фонд” капиталын 120 млн долларга чейин көбөйтүүнү пландоодо
“Кепилдик фонд” ААКсы Казакстанда өткөн Ulttyq ónim – 2026 эл аралык көргөзмөсүндө Кыргызстандын кепилдик колдоо системасын жана жаңы каржылык инструменттерин тааныштырды. Бул тууралуу аталган фонддон билдиришти.
Иш-чарада фонддун Башкармалыгынын төрагасы Малик-Айдар Абакиров “Каржылоого жеткиликтүүлүктү кеңейтүүдөгү кепилдиктин негизги инструмент катары ролу” аттуу панелдик сессияда баяндама жасады.
Ал өз сөзүндө Кыргызстанда ишкерлерди жана калкты кепилдик аркылуу колдоо системасынын өнүгүшү тууралуу маалымат берип, жаңы инструменттерге токтолду.
Анын айтымында, “Кепилдик фонд” 10 жыл мурун күрөө камсыздоосу жетишсиз болгон ишкерлерди колдоо максатында түзүлгөн. Фонд ишин 4 млн доллар капитал менен баштап, бүгүнкү күндө анын капиталы 75 млн долларга жеткен. Үстүбүздөгү жылы бул көрсөткүчтү 120 млн долларга чейин көбөйтүү пландалууда.
Учурда фонд жеке жана портфелдик кепилдиктерди, исламдык жана ипотекалык кепилдиктерди, ошондой эле ата мекендик автоунааларды алгачкы төлөмсүз сатып алуу үчүн кепилдик берүү механизмдерин сунуштап келет.
Малик-Айдар Абакиров ошондой эле фонд ишкерлерге каржылык колдоо менен катар финансылык эмес кызматтарды да көрсөтүүгө басым жасап жатканын белгиледи.
Маалыматка ылайык, өткөн жылы Дүйнөлүк банктын долбоору ийгиликтүү аяктап, “эң жогорку деңгээлде канааттандырарлык” деген баага татыган. Бул тажрыйба учурда Тажикстан жана Өзбекстан тарабынан изилденүүдө.
Бүгүнкү күндө “Кепилдик фонд” жалпы суммасы 100 млн доллардан ашкан бир катар долбоорлорду ишке ашырууда.
