Кыргызстанда дары-дармек жана витамин өндүрүүчү ишкана ачуу пландалууда
Экономика жана коммерция министри Бакыт Сыдыков Түркиянын “UNIEN PHARMA İLAÇ TEKNOLOJİ LTD. ŞTİ.” компаниясынын негиздөөчүсү Сафа Йылмаз жана компания өкүлдөрү менен жолугушуу өткөрдү. Бул тууралуу министрликтен билдиришти.
Жолугушууда Кыргызстанда дары-дармек каражаттарын жана биологиялык активдүү кошулмаларды — витаминдерди өндүрүүчү ишкана ачуу мүмкүнчүлүктөрү талкууланды.
Тараптар ошондой эле Кыргызстанда өндүрүлгөн продукцияны экспорттоо, логистикалык мүмкүнчүлүктөр жана инвестициялык кызматташтыкты кеңейтүү маселелери боюнча пикир алышты.
Бакыт Сыдыков өлкөдө калкты сапаттуу жана коопсуз дары-дармек менен камсыз кылууга өзгөчө көңүл буруларын белгиледи. Ошондой эле дары-дармектерди мыйзамдуу жана көзөмөлдөнгөн негизде жеткирүүнүн маанилүүлүгүн баса көрсөттү.
Министрдин айтымында, жергиликтүү дары-дармек жана витамин өндүрүшүн өнүктүрүү мамлекеттик саясаттын артыкчылыктуу багыттарынын бири болуп саналат. Бул багыттагы инвестициялык долбоорлорго мамлекет тарабынан колдоо көрсөтүлөрү айтылды.
Жолугушуунун жыйынтыгында тараптар фармацевтика тармагындагы кызматташтыкты өнүктүрүүгө кызыкдар экенин билдирип, конкреттүү долбоорлор боюнча биргелешкен ишти улантууга макулдашышты.
