Кыргызстандагы жашыл технологиялар ишканалардын кирешесин 115%га көбөйттү
Экономика жана коммерция министрлигинде GIZдин “Кыргыз Республикасында жашыл экономика жана жеке сектордун туруктуу өнүгүүсү” программасынын жыйынтыктоочу жыйыны өттү.
Министрликтен билдиргендей, жыйында 2025-жылдын январынан 2026-жылдын май айына чейин өлкөдө жашыл экономика багытында ишке ашырылган долбоорлордун жыйынтыгы чыгарылды.
Маалыматка ылайык, жашыл практикаларды киргизүүнүн натыйжасында Кыргызстандагы 2 199 чакан жана орто ишкана кирешесин орточо 115%га көбөйткөн.
Программанын алкагында жылуулук насосторун жана күн энергиясын колдонуу, SMART FARM жана акылдуу сугаруу системаларын киргизүү, No-till технологиясын сегиз райондо жайылтуу сыяктуу долбоорлор ишке ашырылды.
Мындан тышкары, Ысык-Көл облусундагы 34 туристтик объектке эко-маркировка берилип, Ош шаарында 8 тонна пластик чогултулган. Ошондой эле аял кол өнөрчүлөрдү Amazon жана eBay эл аралык платформаларына чыгаруу боюнча иштер жүргүзүлгөн.
Программанын жыйынтыгында 1 768 жаңы жумуш орду түзүлүп, колдоого алынган тармактарда көмүр кычкыл газынын бөлүнүп чыгышы орточо 88%га кыскарганы белгиленди.
