Кыргызстандын улуттук азыктары Ташкенттеги фестивалда чоң кызыгуу жаратты
23-майда Ташкент шаарында маданий салттардын жана улуттук тамак-аштардын XXII эл аралык кайрымдуулук фестивалы өттү. Бул тууралуу Экономика жана коммерция министрлигинен билдиришти.
Иш-чаранын алкагында Экономика жана коммерция министрлигине караштуу Кыргызстандын Өзбекстандагы Соода өкүлчүлүгү өлкөнүн улуттук павильонун уюштурууга көмөк көрсөттү. Ошондой эле “Алайку Органикс”, “Абдыш-Ата” жана “Медовая артель” сыяктуу ата мекендик өндүрүүчүлөрдүн катышуусу камсыздалды.
Фестивалда кыргыз бренддеринин продукциялары, улуттук тамак-аштар жана кол өнөрчүлүк буюмдары чет элдик дипломаттардын жана коноктордун өзгөчө кызыгуусун жаратты.
Уюштуруучулардын айтымында, иш-чарага катышуу Кыргызстандын экспорттук потенциалын таанытууга жана гуманитардык байланыштарды чыңдоого өбөлгө түздү.
Фестиваль кайрымдуулук максатында өткөрүлүп, сатуудан түшкөн каражаттар онкологиялык оорулардан жабыркаган жана майыптыгы бар балдарга жардам көрсөтүүгө багытталат.
