Кытайлык инвесторлор Кыргызстанда цемент заводун курууга кызыкдар
Инвестициялар боюнча улуттук агенттиктин директору Равшанбек Сабиров Кытайдын “Синьтай Янлинь Цемент” жана “Синьтай Тайсин Механикалык Жабдуулар” компанияларынын өкүлдөрү менен жолугушту.
Агенттиктин маалыматына ылайык, жолугушууда Кыргызстанда цемент заводун куруу боюнча инвестициялык долбоорду ишке ашыруу мүмкүнчүлүктөрү талкууланды.
Компания өкүлдөрү өлкөдө заманбап цемент өндүрүш комплексин ишке киргизүүгө жана курулуш тармагын өнүктүрүүгө кызыкдар экенин билдиришти.
Тараптар кызматташуунун мүмкүн болгон багыттарын, өндүрүштүк кубаттуулуктарды жайгаштыруу маселелерин, инвестициялык шарттарды, ошондой эле өндүрүштү жергиликтештирүү жана жаңы жумуш орундарын түзүү перспективаларын карашты.
Жолугушуунун жыйынтыгында тараптар инвестициялык кызматташууну тереңдетүүгө даяр экенин билдирип, цемент заводун куруу долбоорун деталдуу иштеп чыгууну улантуу боюнча макулдашышты.
Анын алкагында долбоорду ишке ашыруу үчүн мүмкүн болгон аянтчаларды, инвестициялык параметрлерди жана өз ара аракеттенүү механизмдерин изилдөө каралат.
