Россияга экспорттоодо жаңы СПОТ системасы 1-июндан тарта күчүнө кирет

Экономика жана коммерция министрлигинде бизнес-коомчулуктун жана тышкы экономикалык ишмердүүлүктүн өкүлдөрү менен жумушчу кеңешме өттү.

Ведомствонун маалыматына ылайык, жолугушуунун негизги темасы Россия Федерациясында товарларды жеткирүүнү күтүүнү тастыктоо системасынын (СПОТ) ишке киргизилиши болду.

Система 2026-жылдын 1-июнунан тарта толук кандуу режимде иштей баштайт.

Кеңешменин жүрүшүндө бизнес өкүлдөрүнө СПОТ системасына байланыштуу экспортчулар үчүн коюлган техникалык жана жол-жоболук талаптар түшүндүрүлдү.

Ошондой эле министрлик жаңы талаптарга ылайыкташууга көмөк көрсөтүү максатында экспортчулар үчүн окутуу семинарларын уюштурууну пландап жатканын билдирди.

Окутууларда СПОТ системасында иштөө эрежелери, товарларды маркировкалоо, сертификациялоо жана коштоочу документтерди тариздөө тартиби камтылат.

Министрлик СПОТ системасында арыз россиялык импортчу тарабынан толтуруларын эскертип, бардык документтер система аркылуу жүктөлөрүн маалымдады. Тариздөөнүн жыйынтыгында QR-код форматындагы алдыдагы жеткирүү тууралуу документ түзүлөт.

Буга байланыштуу экспортчуларга аталган документти импортчулардан алдын ала сурап, жүктү ташууда айдоочуларга берүү сунушталды.