Үрүмчүдө Кыргызстандын Соода-өнөр жай палатасынын өкүлчүлүгү ачылды

Кытайдын Үрүмчү шаарында Кыргызстан менен Кытайдын соода-экономикалык жана инвестициялык кызматташтыгына арналган иш-чаралар өттү. Бул тууралуу экономика жана коммерция министрлигинен билдиришти.

Анын алкагында “Синьцзян (Кытай) – Кыргыз Республикасы” инвестициялык жана тышкы соода форуму уюштурулуп, Кыргызстандын делегациясын экономика жана коммерция министринин орун басары Султан Ахматов жетектеди.

Жолугушууда тараптар соода-экономикалык байланыштарды кеңейтүү, инвестициялык кызматташтыкты күчөтүү, өнөр жай кооперациясын жана логистикалык инфраструктураны өнүктүрүү маселелерин талкуулашты.

Өзгөчө көңүл биргелешкен инвестициялык долбоорлорго, аймактар аралык кызматташтыкка жана экспорттук-импорттук мүмкүнчүлүктөрдү кеңейтүүгө бурулду.

Ошондой эле Үрүмчүдө “Кыргызстан – Синьцзян (Кытай)” III Бизнес кеңешинин жыйыны өтүп, ага мамлекеттик органдардын жана бизнес өкүлдөрүнүн катышуусу камсыздалды.

Форумдун алкагында Кыргыз Республикасынын Соода-өнөр жай палатасынын СУАРдагы өкүлчүлүгү расмий ачылды. Өкүлчүлүк Кыргызстандын экспорттук потенциалын илгерилетүүгө жана кыргыз-кытай ишкер чөйрөлөрүнүн байланышын чыңдоого багытталат.

Мындан тышкары, форумдун жүрүшүндө кыргыз жана кытай ишкерлеринин ортосунда кызматташуу боюнча бир катар меморандумдарга кол коюлду.