Асман шаарында заманбап дата-борборлор курулушу мүмкүн
Бүгүн Инвестициялар боюнча улуттук агенттиктин директору Равшанбек Сабиров кытайлык Ivan Xu инвестициялык-технологиялык компаниясынын өкүлдөрү менен жолугушту.
Агенттиктен билдиргендей, жолугушууда тараптар Кыргызстандагы инвестициялык мүмкүнчүлүктөрдү жана биргелешкен долбоорлорду ишке ашыруу маселелерин талкуулашты. Анда санариптик инфраструктура, энергетика, өнөр жай, логистика жана экологиялык туруктуу долбоорлор боюнча кызматташуу багыттарына өзгөчө көңүл бурулду.
Равшанбек Сабиров Кыргызстан жогорку технологиялык долбоорлорду ишке ашырууга жана заманбап санариптик чечимдерге инвестиция тартууга кызыкдар экенин белгиледи.
Жолугушуунун жыйынтыгында тараптар Асман шаарында заманбап дата-борборлорду куруу долбоорун ишке ашыруу мүмкүнчүлүктөрүн талкуулашты. Ivan Xu компаниясынын өкүлдөрү бул демилгени мындан ары өнүктүрүүгө кызыкдар экенин билдиришти.
