Кыргызстан, Беларусь жана Кытайдын эркин экономикалык аймактары кызматташат
ШКУга мүчө мамлекеттердин аймак жетекчилеринин V форумунун алкагында бир катар меморандумдарга жана келишимдерге кол коюлду. Бул тууралуу Экономика жана коммерция министрлигинин басма сөз кызматы билдирди.
Маалыматка таянсак, Чолпон-Ата шаарында өткөн форумдун алкагында Кыргызстан, Беларусь жана Кытайдын шаарлары, аймактары жана эркин экономикалык аймактары ортосунда кызматташтык боюнча документтерге кол коюлду.
Алардын ичинде:
“Бишкек” жана “Брест” эркин экономикалык аймактарынын ортосундагы кызматташтык меморандуму;
Бишкек менен Кытайдын Чжэнчжоу шаарынын ортосунда достук байланыштарды түзүү жөнүндө келишим;
“Нарын» жана «Брест” эркин экономикалык аймактарынын кызматташтык келишими;
Каракол менен Брест шаарларынын ортосундагы 2026–2027-жылдарга карата жол картасы.
Кол коюлган документтер аймактар аралык өнөктөштүктү чыңдоого, инвестициялык жана соода-экономикалык кызматташтыкты кеңейтүүгө, ошондой эле гуманитардык байланыштарды өнүктүрүүгө багытталган.
