Милдеттүү камсыздандыруу боюнча мыйзам долбоору Жогорку Кеңештин күн тартибинен алынып салынды
Бүгүн Кыргыз Республикасынын Жогорку Кеңешинин жыйынында “Кыргыз Республикасында милдеттүү камсыздандыруу чөйрөсүндөгү айрым мыйзам актыларына өзгөртүүлөрдү киргизүү жөнүндө” мыйзам долбоору экинчи окууда каралды.
Мыйзам долбоорун Жогорку Кеңештин Финансы, бюджет, ишкердик жана атаандаштыкты өнүктүрүү боюнча комитетинин төрагасынын орун басары Жаныбек Абиров тааныштырды. Анын айтымында, документ турак жайларды өрттөн жана табигый кырсыктардан милдеттүү камсыздандыруу системасын өркүндөтүүгө багытталган.
Ошондой эле мыйзам долбоорунун негизги максаты камсыздандыруу системасынын финансылык туруктуулугун жогорулатуу жана жарандардын укуктук корголушун күчөтүү экени белгиленди. Документ камсыздандыруу төлөмдөрүн өз убагында жана кепилденген тартипте төлөп берүүнү камсыздоого багытталган.
Баяндамачынын маалыматына ылайык, экинчи окууга чейин депутаттар тарабынан бир катар сунуштар берилип, тиешелүү корутундулар алынган. Анда камсыздандыруу кызматтарынын жеткиликтүүлүгүн жана натыйжалуулугун жогорулатуу, исламдык камсыздандыруу механизмдерин өнүктүрүү, ошондой эле жарандардын камсыздандыруу кызматтарын тандоо мүмкүнчүлүгүн кеңейтүү каралган.
Талкуу учурунда депутаттар мыйзам долбоорундагы айрым маселелер боюнча суроолорун жана сын-пикирлерин айтышты. Тактап айтканда, жер титирөөнүн күчү 5–6 балл менен чектелип көрсөтүлгөнү, кырсыктан кийин сертификат алуудагы кыйынчылыктар, ошондой эле “такафул” термининин кыргызча эмес, араб тилинде колдонулганы тууралуу маселелер көтөрүлдү.
Узакка созулган талкуудан кийин мыйзам долбоору боюнча тактоону талап кылган жагдайлар бар экени белгиленип, комитеттин сунушу менен документ күн тартибинен алынып салынды.
