Кыргызстанда 3 коммерциялык банктын лицензиясы чакыртылып, жоюлуу стадиясында турат
2026-жылдын январь-март айларында Кыргыз Республикасынын экономикасынын финансылык секторундагы ишканалардын иш-аракеттеринин негизги көрсөткүчтөрүнө таянсак, оң финансылык көрсөткүчтөр катталган. Бул тууралуу Улуттук статистика комитетинин бюллетенинде маалымдалат.
Расмий маалыматка ылайык, отчеттук мезгилде өлкө боюнча 485 финансылык сектордун ишканасы жана алардын 785 филиалы иш алып барган. Алардын ичинен 290 ишкана жалпы 9 млрд 990,5 млн сом пайда тапкан. Ошол эле учурда 90 ишкана 504,6 млн сом чыгаша көрсөткөн. Ал эми 100 ишкананын финансылык жыйынтыгы нөлгө барабар болгон.
Жыйынтыгында ишканалардын сальдолоштурулган финансылык көрсөткүчү 9 млрд 485,9 млн сомду түзгөн.
Өлкө боюнча көрсөтүлгөн мезгил аралыгында 27 коммерциялык банк жана алардын 309 филиалы ишмердүүлүк жүргүзгөн. Алардын ичинен 20 банк пайда менен иштеп, жалпы кирешеси 7 млрд 622,2 млн сомго жеткен. Ал эми 6 банк 158,6 млн сом чыгашага учурап, дагы бир банктын финансылык жыйынтыгы нөлгө барабар болгон. Банктардын жалпы сальдолоштурулган финансылык жыйынтыгы 7 млрд 463,6 млн сомду түзгөн.
Ошондой эле билдирүүдө 27 коммерциялык банктын 24ү учурда иштеп жатканы, ал эми 3 банктын лицензиясы кайтарылып алынып, жоюлуу стадиясында тургандыгы белгиленген.
Мындан тышкары, 439 кредиттик уюм жана алардын 434 филиалы иш алып барып, 259 уюм 2 млрд 44,8 млн сом пайда тапкан. 78 кредиттик уюм чыгаша көрсөткөн болсо, 102 уюмдун финансылык жыйынтыгы нөл менен аяктаган.
Ал эми камсыздандыруу тармагында 19 компания жана алардын 42 филиалы иш жүргүзгөн. Алардын 11и 323,5 млн сом пайда тапса, 6 компания 243 млн сом чыгашага учураган.
