РКӨФ ЕАЭБде евразиялык өнөр жай аймактарын түзүүнү сунуштайт
Россия-Кыргыз өнүгүү фондунун башкармасынын төрагасы Артем Новиков РФнын элчилиги тарабынан ЕАЭБ күнүн утурлай уюштурулган тегерек столдун жүрүшүндө евразиялык өнөр жай аймактарын түзүү демилгесин көтөрдү.
Анын айтымында, Кыргызстан ЕАЭБге мүчө болгон 11 жыл ичинде өлкөнүн ИДПсы төрт эсеге өсүп, Биримдик өлкөлөрүнөн келген инвестициялар эки эсе көбөйгөн. Ал эми ЕАЭБ мамлекеттерине экспорттун көлөмү 1,2 млрд долларга жеткен.
Артем Новиков РКӨФтүн өнөр жай кооперациясын өнүктүрүүдөгү ролун да белгилеп, фонд ушул убакка чейин 3700дөн ашык аймактык долбоорду 1,15 млрд долларга каржылаганын билдирди. Жалпысынан фонддун Кыргызстан экономикасына кошкон салымы 2 млрд долларга жакындаган.
Ошондой эле фонд колдогон компаниялардын былтыркы жалпы кирешеси 172 млрд сомду түзүп, бул Кыргызстандын ИДПсынын дээрлик 10 % барабар болгону айтылды. Мындан тышкары, фонддун колдоосу менен 33 миңден ашуун жумуш орду түзүлгөн.
“Биз ресурстарды өздөштүрүү темпи жана мурда каржылаган көлөмдөр азыркы экономикалык өсүү темпин сактоо үчүн жетишсиз экенин түшүнөбүз. Бул жагынан алганда, биз тийиштүү эсептөөлөрдү жүргүздүк. 2030-жылга чейин биз Кыргызстандын экономикасына өзүбүздүн жана Евразия экономикалык биримдигинин рынокторунан, анын ичинде Кыргыз Республикасынан тартылган каражаттарды дагы болжол менен 1 миллиард доллар инвестициялайбыз деп ишенем”, - деп белгиледи Артем Новиков.
Новиков ЕАЭБ өлкөлөрү ички атаандаштыктан биргелешкен өндүрүш долбоорлоруна өтүшү керектигин белгилеп, евразиялык өнөр жай аймактарын түзүү жана бизнес үчүн бирдиктүү санариптик мейкиндикти өнүктүрүү маанилүү экенин кошумчалады.
