Ат-Башыда көмүрдү тазалоочу жана байытуучу ишкана ишке кирди
Ат-Башы районунда көмүрдү тазалоочу жана байытуучу заманбап фабрика ишке киргизилип, өндүрүш тармагындагы маанилүү долбоорлордун бири катары өз ишин баштады. Бул тууралуу Ат-Башы райондук мамлекеттик администрациясынын басма сөз кызматы билдирди.
Маалыматка ылайык, күнүнө 3 миң тонна көмүрдү тазалап жана байытууга мүмкүнчүлүгү бар фабрика райондун экономикасын өнүктүрүүгө, жаңы жумуш орундарын түзүүгө жана жергиликтүү бюджеттин киреше бөлүгүн көбөйтүүгө олуттуу салым кошот. Ошондой эле калкты сапаттуу жана жеткиликтүү көмүр менен камсыз кылууга шарт түзүүдө.
Долбоорду ишке ашырууга жалпы 2 миллион доллар өлчөмүндө инвестиция тартылып, анын натыйжасында 50 жаңы жумуш орду түзүлдү. Фабрикада көмүрдү заманбап технологиялар аркылуу тазалоо жана байытуу иштери жүргүзүлүп, анын сапатын жогорулатууга өзгөчө көңүл бурулууда.
Бул өндүрүш объектинин ишке кириши Ат-Башы районунун социалдык-экономикалык өнүгүүсүнө оң таасирин тийгизип, көмүр өнөр жайын өнүктүрүүгө жана ички рынокту ата мекендик сапаттуу көмүр менен камсыз кылууга кеңири мүмкүнчүлүк ачылууда. Райондо инвестициялык долбоорлордун көбөйүшү жаңы жумуш орундарын түзүп, калктын жашоо деңгээлин жакшыртууга өбөлгө болууда.
