Кыргызстан менен Беларустун эркин экономикалык аймактары өнөктөштүктү кеңейтет

Чолпон-Ата шаарында өткөн Шанхай кызматташтык уюмуна (ШКУ) мүчө мамлекеттердин аймак жетекчилеринин V форумунун алкагында бир катар кызматташтык документтерине кол коюлду. Бул тууралуу Инвестициялар боюнча улуттук агенттиктен билдиришти.

Форумдун маанилүү жыйынтыктарынын бири катары Кыргыз Республикасынын "Нарын" эркин экономикалык аймагынын Башкы дирекциясы менен Беларусь Республикасынын "Брест" эркин экономикалык аймагынын администрациясынын ортосунда кызматташуу жөнүндө макулдашууга кол коюлду.

Макулдашуу инвестицияларды тартуу, биргелешкен ишканаларды түзүү, өндүрүштүк кооперацияны өнүктүрүү жана эркин экономикалык аймактарды башкаруу боюнча тажрыйба алмашуу багыттарында өз ара кызматташууну кеңейтүүгө багытталган.

Тараптар бул документ соода-экономикалык жана инвестициялык байланыштарды бекемдөөгө, жаңы биргелешкен долбоорлорду ишке ашырууга жана узак мөөнөттүү өнөктөштүктү өнүктүрүүгө өбөлгө түзөрүн белгилешти.

Форум ШКУга мүчө мамлекеттердин аймактарынын ортосундагы кызматташтыкты тереңдетүү, жаңы өнөктөштүк байланыштарды түзүү жана инвестициялык мүмкүнчүлүктөрдү кеңейтүү үчүн маанилүү аянтча болуп калды.