Кыргызстан менен Тунис соода-экономикалык багытта кызматташат
Экономика жана коммерция министринин орун басары Султан Ахматов Жогорку Евразиялык экономикалык кеңештин жыйынынын жана V Евразиялык экономикалык форумдун жыйынтыктары тууралуу маалымат берди. Бул тууралуу аталган министрликтин басма сөз кызматы билдирди.
Анын айтымында, президенттердин жыйынында 18 маселе каралып, ЕАЭБ алкагында жасалма интеллектти жоопкерчиликтүү өнүктүрүү боюнча биргелешкен билдирүү кабыл алынды.
Мындан тышкары, үчүнчү өлкөлөр менен соода-экономикалык кызматташтыкты кеңейтүү, Тунис менен эркин соода аймагын түзүү боюнча сүйлөшүүлөрдү баштоо, ошондой эле агрардык кооперациялык долбоорлорду каржылоо механизмин кеңейтүү маселелери талкууланды.
Астанада өткөн V Евразиялык экономикалык форумдун негизги темасы “ЕАЭБ глобалдык санариптик жарышта: жасалма интеллектке коюм” болду.
Форумда электрондук соода, санариптик трансформация, транспорт жана логистика, жасалма интеллектти колдонуу жана эмгек рыногун өнүктүрүү боюнча 30га жакын сессия өттү.
