Кыргызстандын инвестициялык потенциалы Индияда тааныштырылды
Индияда өткөн Шанхай Кызматташтык Уюмунун (ШКУ) Соода кеңешинин эл аралык диалогунда Кыргыз Республикасынын Соода-өнөр жай палатасынын Индиядагы өкүлү Бектурган Калыбек уулу өлкөнүн инвестициялык потенциалын тааныштырды.
Соода-өнөр жай палатасынын маалыматына ылайык, иш-чарага Кыргызстан, Индия, Ирак, Түштүк Корея жана башка өнөктөш мамлекеттерден дипломаттар, мамлекеттик органдардын өкүлдөрү, бизнес чөйрөсүнүн өкүлдөрү, тармактык эксперттер жана ишкерлер катышты.
Диалогдун негизги темасы экономикалык кызматташтыкты кеңейтүү, соода байланыштарын өнүктүрүү жана аймактык туруктуу өсүштү камсыздай турган жаңы мүмкүнчүлүктөрдү аныктоо болду.
Өз сөзүндө Бектурган Калыбек уулу Кыргызстанда жүргүзүлүп жаткан экономикалык реформаларга, инвестициялык климатты жакшыртуу боюнча көрүлүп жаткан чараларга, ошондой эле транспорттук жана логистикалык инфраструктураны өнүктүрүүгө токтолду. Мындан сырткары, ал өлкөнүн аймактагы соода байланыштарын чыңдоодогу ролун белгиледи.
Катышуучуларга Кыргызстан Евразиянын негизги транспорттук коридорлорунун кесилишинде жайгашкандыктан, Азия менен Европанын ортосундагы маанилүү байланыштыруучу борбор катары эл аралык бизнес жана инвесторлор үчүн кеңири мүмкүнчүлүктөрдү түзүп жаткандыгы тууралуу маалымат берилди.
Иш-чаранын жүрүшүндө аймактык кызматташтыкты күчөтүү, инвестицияларды тартуу жана өз ара соода алакаларын кеңейтүү боюнча пикир алмашуу болду.
