Баалуу металлдар департаментин модернизациялоо маселеси каралды
Финансы министри Руслан Суйналиев Финансы министрлигине караштуу Баалуу металлдар департаментине иш сапары менен барып, мекеменин учурдагы ишмердүүлүгү, жетишкендиктери жана келечектеги өнүгүү багыттары менен таанышты. Бул тууралуу аталган министрликтин басма сөз кызматы билдирди.
Маалыматка ылайык, жолугушууда департаменттин директору Алмаз Кадыракунов мекеменин ишмердүүлүгү жана тармакты өнүктүрүү боюнча жүргүзүлүп жаткан иштер тууралуу маалымат берип, 1991-жылы түзүлгөн баалуу металлдар департаменти өлкөдөгү баалуу металлдар жана асыл таштар тармагын жөнгө салуучу негизги мамлекеттик орган экенин белгиледи.
Өзгөчө көңүл департаменттин ишмердүүлүгүн модернизациялоо маселелерине бурулду. Акыркы жылдары санариптик трансформациялоо боюнча чаралар көрүлүп, ведомстволор аралык маалымат алмашуу жөнгө салынып, башкаруу процесстеринин натыйжалуулугу жогорулатылды.
Ошондой эле Мамлекеттик баалуу металлдар жана асыл таштар фондунун иши тууралуу маалымат берилип, фонддун туруктуу толукталып жатканы жана мамлекеттик бюджеттин киреше бөлүгүнө салым кошуп жатканы белгиленди. Иш сапардын алкагында министр “Зергер өрөөнү” көргөзмөсү, баалуу таштарды кыркуу жана иштетүү цехи, ошондой эле фонддун уникалдуу экспонаттары менен таанышты.
Жолугушууда зергерчилик тармагын өнүктүрүү, жаш адистерди даярдоо жана ведомстволор аралык кызматташтыкты кеңейтүү маселелери талкууланды.
