Эсептөө палатасын санариптештирүү боюнча мыйзам долбоору талкууланды
Бүгүн Жогорку Кеңештин Финансы, бюджет, ишкердик жана атаандаштыкты өнүктүрүү боюнча комитетинде “Кыргыз Республикасынын Эсептөө палатасы жөнүндө” конституциялык мыйзамга өзгөртүүлөрдү киргизүү тууралуу мыйзам долбоору биринчи окууда каралды.
Документ тышкы мамлекеттик аудиттин натыйжалуулугун, ачык-айкындуулугун жана көз карандысыздыгын күчөтүүгө багытталган. Анын алкагында электрондук (онлайн) аудитти киргизүү, тобокелдиктерди алдын ала аныктоого багытталган проактивдүү аудитти өнүктүрүү жана аудитордук ишти санариптештирүү сунушталды.
Баяндамачы КРнын Юстиция министри Аяз Баетовдун айтымында, долбоорду иштеп чыгууга мамлекеттик финсылык аудитти өркүндөтүү боюнча президенттин жарлыгы негиз болгон. Мыйзам долбоору узакка созулган көчмө текшерүүлөрдүн санын кыскартууну карайт.
Талкуу маалында депутаттар санариптик аудитти колдошкону менен Эсептөө палатасынын көз карандысыз макамын сактоо, маалыматтардын купуялуулугу, киберкоопсуздук жана электрондук платформалардын ишенимдүүлүгү боюнча бир катар суроолорду козгошту.
Жыйынтыгында мыйзам долбоорунун айрым жоболорун кошумча иштеп чыгуу керектиги жүйөө келтирилип, маселе күн тартибинен алынып, кайрадан толуктап жана тактап келүү сунушталды.
