Кыргызстандык тигүүчүлөр үчүн экспорттук талаптар түшүндүрүлдү
Экономика жана коммерция министрлигинде жеңил өнөр жай продукцияларын экспорттоо жана алардын техникалык талаптарга шайкештигин камсыздоо маселелери боюнча кеңешме өттү.
Ведомствонун маалыматына ылайык, жыйындын негизги темасы "Жеңил өнөр жай продукциясынын коопсуздугу жөнүндө" Бажы бирлигинин техникалык регламентинин талаптарын практикалык колдонуу болду. Катышуучулар продукцияны маркалоо, декларациялоо жана сертификаттоо жол-жоболорун талкуулашты.
Кеңешмеге Кыргыз Республикасынын Селлерлер жана маркетплейстер ассоциациясынын өкүлдөрү, жеңил өнөр жай ишканалары жана шайкештикти баалоо органдары катышты.
Жыйындын жүрүшүндө продукциянын түрүнө жараша шайкештикти баалоо, сыноолорду өткөрүү жана маркалоону колдонуу тартиби боюнча түшүндүрмөлөр берилди.
Министрликтин маалыматына ылайык, техникалык регламенттердин талаптарын так сактоо продукциянын сапатын жогорулатып, экспорттук рыноктордо атаандаштыкка жөндөмдүүлүктү арттырууга, ошондой эле керектөөчүлөрдүн ишенимин бекемдөөгө мүмкүндүк берет.
