Оштогу 32 айылды таза суу менен камсыздоого 66,7 млн доллар бөлүнөт
Ош облусунун Кара-Суу жана Өзгөн райондорундагы 32 айылдын тургундарын таза ичүүчү суу менен камсыздоого багытталган ири долбоор ишке ашырылат. Бул тууралуу Айыл чарба министрлигинен маалымдашты.
Бул маселе боюнча Кыргыз Республикасынын расмий делегациясы Евразиялык турукташтыруу жана өнүктүрүү фонду (ЕТӨФ) менен сүйлөшүүлөрдү өткөрдү.
Долбоор аймактагы эң көйгөйлүү маселелердин бирин чечүүгө багытталган. Учурда аталган айылдарда жашаган 158 миңге жакын тургун эскирген суу түтүк тармактарын же коопсуз эмес суу булактарын колдонуп келет.
Долбоордун жалпы бюджети 66,7 миллион АКШ долларын түзөт. Анын ичинен Евразиялык турукташтыруу жана өнүктүрүү фонду 60 миллион доллар өлчөмүндө насыя бөлсө, Кыргызстан 6,7 миллион доллар кошумча каржылайт.
Долбоордун алкагында 890 чакырымдан ашык суу түтүктөрү жана бөлүштүрүү тармактары курулуп, жаңыланат. Ошондой эле 33 артезиан скважинасы бургуланып, 54 резервуар жана 11 насос станциясы курулат.
Мындан тышкары, мектептердеги, бала бакчалардагы жана фельдшердик-акушердик пункттардагы 95 санитардык түйүн жаңыланат.
Долбоорду ишке ашыруу мөөнөтү макулдашуу күчүнө кирген күндөн тартып беш жылды түзөт. Документке 2026-жылдын июнь айынын аягына чейин кол коюу пландалууда.
