“Тамчы” атайын финансылык-инвестициялык аймагы Ысык-Көлдө бизнес-борборун ачат
“Тамчы” атайын финансылык-инвестициялык аймагы Ысык-Көлдүн жээгинде алгачкы бизнес-борборун ачат. Бул жерде АФИАнын башкаруучу компаниясынын кеңселери жайгашат. Ушул учурдан тартып аймак бизнес менен расмий иштөөгө жана алгачкы резиденттерди кабыл алууга даярдык көрө баштайт. Бул тууралуу Экономика жана коммерция министрлигинин басма сөз кызматы билдирди.
Маалыматка ылайык, аянты 3 850 чарчы метр болгон бизнес-борбор кеңсе жайларын жана коворкинг аймактарын, көп функционалдуу конференц-залдарды жана сүйлөшүү бөлмөлөрүн камтыйт. Жакынкы убакта объекттин аймагында ресторан жана кафе ачылат.
“Тамчы АФИА эл аралык бизнес жаңы ишенимдүү аянтчаларды активдүү издеп жаткан учурда түзүлдү. Алгачкы бизнес-борбордун ачылышы – аймактын реалдуу операциялык ишмердүүлүгүнүн башталышы. Биз КМШ өлкөлөрүнүн, Азиянын, Жакынкы Чыгыштын, Европанын жана Африканын рынокторунун ортосунда финансылык жана логистикалык көпүрөлөрдү куруп жатабыз. Бүгүн ошол көпүрөнүн алгачкы дареги пайда болду жана бул жерде алгачкы резиденттерди кабыл алууга активдүү даярдык жүрүп жатат»,– деди “Тамчы” АФИАны башкаруу боюнча кеңештин төрагасы, Аяз Баетов.
Бизнес-борбор ачылганга чейин аз убакыт мурда АФИАны башкаруу боюнча кеңеш башкаруучу компанияны түзүп, финансылык борборду өнүктүрүү планын бекитти жана ченемдик укуктук документтердин алгачкы пакетин кабыл алды. Ошол эле учурда Эл аралык талаш-тартыштарды чечүү борборунун төрагасын жана судьяларын тандоо иши жүрүп жатат.
“Тамчы” атайын финансылык-инвестициялык аймагы Ысык-Көлдүн жээгиндеги болжол менен 6 000 гектар аянтта түзүлгөн. Резиденттер үчүн англиялык жалпы укуктун ченемдери боюнча иштөө, 49 жылдык мөөнөткө нөлдүк салык ставкасы жана пайданы 100 пайыз репатриациялоо укугу каралган. 2035-жылга чейин аймакта 3 900дөн ашуун компанияны жайгаштыруу жана 10 000ден ашык жумуш ордун түзүү пландалууда.
