Үч айда экономиканын субъектилерине 610 млрд сомдон ашык кредит берилди
2026-жылдын январь–март айларында Кыргызстандагы экономиканын субъектилери коммерциялык банктар жана кредиттик уюмдар аркылуу жалпысынан 610,4 млрд сомдон ашык кредит алышкан. Бул тууралуу Улуттук статистика комитетинин маалыматында айтылат.
Маалыматка ылайык, отчеттук мезгилдин аягына карата коммерциялык банктар тарабынан берилген кредиттердин көлөмү 539,6 млрд сомду түзсө, кредиттик уюмдар аркылуу берилген каражаттар 70,8 млрд сомго жеткен.
Аймактар боюнча эң көп кредит - Бишкек шаарында берилген. Борбор калаадагы экономиканын субъектилери коммерциялык банктар аркылуу 301,1 млрд сом, ал эми кредиттик уюмдар аркылуу 23,7 млрд сом көлөмүндө каражат алышкан.
Экинчи орунда Жалал-Абад облусу турат. Бул аймакта коммерциялык банктар тарабынан 51,4 млрд сом кредит берилсе, кредиттик уюмдар аркылуу каржылоонун көлөмү 8,7 млрд сомду түзгөн.
Кредиттик ресурстардын өсүшү ишкерлердин, өндүрүш ишканаларынын, фермерлердин жана башка чарба жүргүзүүчү субъектилердин инвестициялык мүмкүнчүлүктөрүн кеңейтүүгө өбөлгө түзөт.
Белгилей кетсек, экономиканын субъектилерине - өлкөнүн экономикасына катышкан бардык тараптар – жарандар, үй чарбалары, ишканалар, ишкерлер, инвесторлор, мамлекеттик мекемелер жана финансылык уюмдар кирет. Алар товарларды жана кызматтарды өндүрүү, бөлүштүрүү жана керектөө процесстеринде негизги ролду ойношот.
