Адылбек Касымалиев өнөр жай жана соода көргөзмөсүнө катышты
Министрлер Кабинетинин Төрагасы Адылбек Касымалиев борбордо өтүп жаткан “Ala-Too Trade & Industry Expo” биринчи эл аралык өнөр жай жана соода көргөзмөсүнө барды. Бул тууралуу президенттик админстрациянын маалыматтык саясат бөлүмүнөн билдиришти.
Маалыматка ылайык, көргөзмөнү көрүү учурунда Министрлер Кабинетинин Төрагасы ата мекендик жана чет элдик компаниялардын, өнөр жай ишканаларынын продукцияларынын, инновациялык иштеп чыгуулардын жана экономиканын ар түрдүү тармактарындагы инвестициялык долбоорлордун экспозициялары менен таанышты.
Экспозицияларды жана улуттук павильондорду көрүп чыгуунун жүрүшүндө Адылбек Касымалиев ата мекендик өндүрүүчүлөрдү мамлекеттик колдоонун, заманбап технологияларды киргизүүнүн жана өлкөнүн туруктуу экономикалык өсүшүнүн негизги багыттарынын бири катары өнөр жай секторун өнүктүрүүнүн маанилүүлүгүн баса белгиледи.
“Ala-Too Trade & Industry Expo” – бул эл аралык кесипкөй B2B / B2G платформа, ал ШКУ өлкөлөрүнүн жана өнөктөш мамлекеттердин өнөр жай ишканаларын, соода компанияларын, инвесторлорду жана мамлекеттик институттарды бириктирет.
Иш-чара соода-экономикалык байланыштарды чыңдоого, бизнес үчүн жаңы мүмкүнчүлүктөрдү түзүүгө жана өндүрүүчүлөрдүн продукцияларын регионалдык жана эл аралык базарларга жайылтууга багытталган. Көргөзмөгө 6 өлкөдөн 90дон ашык компания катышты.
