Кыргызстан менен Беларусь ишкерлер кеңешин түзүүнү макулдашты
Бишкектеги Ала-Арча мамлекеттик резиденциясында өтүп жаткан “Кыргызстан–Беларусь” эл аралык экономикалык кызматташтык форумуна Министрлер кабинетинин төрагасы Адылбек Касымалиев жана Беларусь Республикасынын премьер-министри Александр Турчин катышты.
Эки өлкөдөн 150гө жакын бизнес өкүлдөрү катышып жаткан форумдун жүрүшүндө тараптар эки өлкөнүн ортосундагы соода-экономикалык кызматташтыкты кеңейтүү, жаңы биргелешкен долбоорлорду ишке ашыруу жана бизнес байланыштарды бекемдөө маселелерин талкуулашты.
Адылбек Касымалиев бүгүнкү форум ишкерлер үчүн ачык диалог жүргүзүүгө, түз байланыш түзүүгө жана жаңы өнөктөштүктөрдү баштоого мүмкүнчүлүк берген маанилүү аянтча экенин белгиледи.
Анын айтымында, Кыргызстан менен Беларустун кызматташтыкты өнүктүрүү үчүн чоң мүмкүнчүлүктөрү бар. Кыргызстан географиялык жайгашуусу жагынан ыңгайлуу болуп, логистика, айыл чарба, жеңил өнөр жай, энергетика жана туризм тармагында потенциалга ээ.
Ал эми Беларусь өнөр жайы, машина куруу, айыл чарба технологиялары жана илимий-өндүрүштүк тажрыйбасы менен айырмаланат.
“Биз бул мүмкүнчүлүктөрдү айкалыштыруу аркылуу чоң натыйжага жетүүгө болот деп эсептейбиз. Бүгүн бул жерге рыноктун муктаждыктарын талкуулап, өз ара пайдалуу чечимдерди табууга даяр болгон бизнес өкүлдөрүнүн келиши өзгөчө маанилүү. Бизнестин түз байланышы — ишенимдин пайдубалы”, — деди Адылбек Касымалиев.
Өз кезегинде Александр Турчин форум эки өлкөнүн бизнес өкүлдөрү үчүн кызматташтыкты өнүктүрүүгө жана жаңы байланыштарды түзүүгө шарт түзгөн натыйжалуу аянтча болуп жатканын белгиледи.
Иш-чаранын алкагында эки өлкөнүн Соода-өнөр жай палаталары кыргыз-беларус ишкерлер кеңешин түзүү тууралуу документтер алмашышты.
