Россиянын бизнеси үчүн олуттуу көйгөй аталды
Россиядагы жогорку инфляция бизнес үчүн негизги көйгөйлөрдүн бири бойдон калууда. Бул тууралуу РФнын Борбордук банкынын төрагасынын орун басары Алексей Заботкин Санкт-Петербург эл аралык экономикалык форумунун алкагында өткөн ишкердик жолугушууда билдирди.
Анын айтымында, керектөө бааларынын тездик менен өсүшү – ишкерлер үчүн жогорку пайыздык ченден дагы көбүрөөк терс таасирин тийгизип жатат.
“Жогорку инфляциянын шартында бизнес жүргүзүү, эки жыл жогорку реалдуу пайыздык чен менен иштегенге караганда кыйла оор” - деп белгиледи, Заботкин.
Ал белгилегендей, инфляция күчөгөн учурда товарлар менен кызмат көрсөтүүлөрдүн баалары “асмандап”, компаниялардын чыгымдары көбөйөт. Бул өз кезегинде ишканалардын финансылык абалына терс таасир этет.
Ошондой эле ишкердик чөйрөсүндөгү дагы бир олуттуу көйгөй катары эмгек өндүрүмдүүлүгүнүн төмөн деңгээли аталды. «Опора России» уюмунун жетекчиси Александр Калининдин айтымында, бул көрсөткүч боюнча россиялык компаниялар чет өлкөлүк атаандаштарынан артта калууда.
Ушуга карабай, көптөгөн россиялык ишканалардын жетекчилери өндүрүмдүүлүктү жогорулатуу маселесине жетиштүү көңүл бурбай жатканын белгилеген Калинин – бул “этибарга албоо” бизнес үчүн кошумча тобокелдик жаратаарын кошумчалады.
