ШКУ жыйыны: Кыргызстан өнөр жай кызматташтыгын чыңдоону сунуштады
5-июнда Чолпон-Атада Шанхай кызматташтык уюмуна мүчө мамлекеттердин өнөр жай министрлеринин кеңешмеси өтүүдө. Бул тууралуу Экономика жана коммерция министрлиги билдирди.
Маалыматка ылайык, иш-чара Кыргызстандын ШКУдагы төрагалыгынын алкагында уюштурулуп, өнөр жай тармагындагы кызматташтыкты кеңейтүүгө жана мамлекеттер ортосундагы экономикалык байланышты чыңдоого багытталган.
Кеңешмеге Министрлер кабинетинин төрагасынын орун басары, экономика жана коммерция министри Бакыт Сыдыков төрагалык кылууда.
Жыйынга Индия, Кытай, Өзбекстан, Казакстан, Тажикстан, Беларусь, Россия, Иран жана Пакистандын өкүлдөрү, ошондой эле Шанхай кызматташтык уюмунун катчылыгынын өкүлдөрү катышууда.
Кеңешменин жүрүшүндө тараптар өнөр жай тармагындагы кызматташтыкты өнүктүрүү, инвестиция тартуу, жаңы технологияларды киргизүү, биргелешкен өндүрүштөрдү өнүктүрүү жана соода-экономикалык байланышты бекемдөө маселелерин талкуулашат.
Мындан тышкары, жыйын ШКУга мүчө мамлекеттердин ортосунда тажрыйба алмашууга жана өнөр жай тармагындагы өнөктөштүктү тереңдетүүгө мүмкүнчүлүк түзөрү белгиленди.
