Кыргызстан менен Кытай өнөр жай кызматташтыгын кеңейтүүнү талкуулашты
Чолпон-Ата шаарында өткөн Шанхай кызматташтык уюмуна (ШКУ) мүчө мамлекеттердин өнөр жай министрлеринин IV кеңешмесинин алкагында экономика жана коммерция министри Бакыт Сыдыков Кытай Эл Республикасынын өнөр жай жана маалыматташтыруу министринин орун басары Синь Гобинь менен жолугушту.
Ведомствонун маалыматына ылайык, жолугушуунун жүрүшүндө тараптар кыргыз-кытай соода-экономикалык жана өнөр жай кызматташтыгын мындан ары кеңейтүү, өнөр жай кооперациясын өнүктүрүү, инновациялык технологияларды киргизүү жана логистикалык байланыштарды чыңдоо маселелерин талкуулашты.
Бакыт Сыдыков Кыргызстандын өнөр жайды өнүктүрүү, санариптештирүү жана маалыматташтыруу багыттарында Кытайдын тажрыйбасын үйрөнүүгө кызыкдар экенин белгиледи.
Өз кезегинде Синь Гобинь Кыргызстан тарабынан ШКУдагы төрагалыктын алкагында уюштурулуп жаткан иш-чаралардын жогорку деңгээлде өткөрүлүп жатканын белгилеп, өнөр жай тармагындагы биргелешкен долбоорлорду ишке ашырууга даяр экенин билдирди.
Мындан тышкары, кытай тарап Кыргызстандын демилгеси менен сунушталган ШКУга мүчө мамлекеттердин Бириккен текстиль кластерин түзүү боюнча макулдашуунун долбоору деталдуу кароого алынганын маалымдады.
Тараптар эки өлкөнүн өнөр жай жана инвестициялык кызматташтыгын тереңдетүү эки тарап үчүн тең пайдалуу болоорун белгилешти.
