Кыргызстан менен Өзбекстан ишкерлер үчүн жаңы мүмкүнчүлүктөрдү кеңейтет
4-июнда Кыргыз Республикасынын Өзбекстан Республикасындагы Соода өкүлчүлүгүнүн өкүлдөрү менен "Узтрейд" акционердик коомунун экспорт боюнча төрагасынын орун басарынын жолугушуусу болуп өттү. Бул тууралуу Экономика жана коммерция министрлигинен билдиришти.
Жолугушуу Кыргыз Республикасынын Экономика жана коммерция министрлиги менен Өзбекстан Республикасынын Инвестициялар, өнөр жай жана соода министрлигинин ортосундагы 2024-2030-жылдарга карата өз ара сооданын көлөмүн көбөйтүү боюнча Иш-чаралар планын ишке ашыруунун жүрүшүн талкуулоого арналды.
Тараптар сүйлөшүүлөрдүн жүрүшүндө эки өлкөнүн ортосундагы товар жүгүртүүнү арттыруу, экспорттук мүмкүнчүлүктөрдү кеңейтүү жана өз ара жеткирүүлөрдү диверсификациялоо боюнча практикалык кадамдарды карап чыгышты. Ошондой эле кыргызстандык жана өзбекстандык ишкерлер үчүн ыңгайлуу шарттарды түзүү жана бизнес байланыштарды өнүктүрүү маселелерине өзгөчө көңүл бурулду.
Жолугушуунун жыйынтыгында кызматташтыкты мындан ары активдештирүү жана жакынкы убакытта биргелешкен B2B форматындагы бизнес иш-чараларды өткөрүү боюнча макулдашууларга жетишилди.
Тараптар 2030-жылга чейин эки мамлекеттин жетекчилиги тарабынан белгиленген максаттарды ишке ашыруу үчүн ишкерлерге ар тараптуу колдоо көрсөтүүгө даяр экендиктерин белгилешти.
