Кыргызстандын экономикалык артыкчылыктары Петербург форумунда талкууланды
Министрлер Кабинетинин Төрагасынын биринчи орун басары Данияр Амангелдиев Санкт-Петербург эл аралык экономикалык форумунун алкагында өткөн бир катар маанилүү панелдик сессияларга катышып, Кыргызстандын агроөнөр жай жана экономикалык өнүгүү багытындагы артыкчылыктуу позицияларын тааныштырды. Бул тууралуу Өкмөттөн билдиришти.
"Эл аралык айыл чарба рынокторун калыптандырууда ЕАЭБ өлкөлөрүнүн ролу" аттуу панелдик сессияда сөз сүйлөгөн Данияр Амангелдиев өлкөнүн азык-түлүк коопсуздугун камсыз кылуу жана айыл чарба продукциясынын экспорттук потенциалын жогорулатуу боюнча жүргүзүлүп жаткан иштерге токтолду.
Анын айтымында, Кыргызстан туруктуу жана инновациялык азык-түлүк системасын өнүктүрүү үчүн мамлекеттик субсидияларды берүү, заманбап санитардык жана ветеринардык стандарттарды киргизүү, суу ресурстарын башкаруунун алдыңкы технологияларын колдонуу жана ЕАЭБ алкагындагы илимий кызматташтыкты кеңейтүү иштерин активдүү жүргүзүүдө. Ошондой эле логистикалык борборлорго инвестиция тартуу жана аквакультура тармагын өнүктүрүү маселелерине өзгөчө көңүл бурулуп жатканын белгиледи.
"Жаңы дүйнөлүк тартиптин экономикасы: структуралык трансформация, чакырыктар жана мүмкүнчүлүктөр" аттуу талкууда Данияр Амангелдиев дүйнөлүк экономикадагы өзгөрүүлөргө баа берип, Кыргызстан жаңы шарттарда соода жана транзиттик каттамдардын маанилүү аймактык борборуна айланып жатканын айтты.
Анын белгилешинче, өлкө Борбор Азиянын географиялык артыкчылыктарын натыйжалуу пайдаланып, ички экономикалык өсүштү жана аймактык туруктуулукту камсыздоого багытталган саясатты жүргүзүүдө.
