Өлкөгө айрым курулуш материалдарын импорттоого убактылуу чектөө киргизүү сунушталууда
Министрлер кабинети үчүнчү өлкөлөрдөн Кыргызстанга айрым курулуш материалдарын алып келүүгө алты айлык мөөнөткө чейин убактылуу тыюу салууну сунуштады. Тиешелүү токтом долбоору коомдук талкууга чыгарылды.
Маалыматка ылайык, акыркы жылдары өлкөдө курулуш материалдарына болгон суроо-талап өскөнү менен айрым тармактарда импорттун көлөмү жергиликтүү өндүрүшкө басым жасап жатат. Натыйжада бир катар ишканалар кампаларда продукциянын топтолушу жана сатуу көлөмүнүн азайышы сыяктуу көйгөйлөргө туш болгон.
Маалымкат-негиздемеде белгиленгендей, демилгенин негизги максаты – ата мекендик өндүрүшчүлөрдү колдоо, ички рынокту турукташтыруу жана үчүнчү өлкөлөрдөн келип жаткан импорттук басымдан коргоо.
Өкмөт акыркы жылдары өлкөдө айнек, кабель, жылуулук изоляциялоочу материалдар жана газобетон блокторун чыгарган ишканалар ишке киргенин белгилейт. Бирок арзан импорттун көбөйүшү жергиликтүү өндүрүшчүлөрдүн продукциясын сатууда кыйынчылыктарды жаратып, айрым ишканалардын кампаларында товарлардын топтолушуна алып келген.
Документте белгиленгендей, убактылуу чектөө киргизүү ата мекендик ишканалардын өндүрүш көлөмүн сактоого, жумуш орундарын коргоого жана бюджетке түшүүчү салыктык кирешелерди камсыз кылууга жардам бермекчи.
