"Кыргыз Экспорт" борбору россиялык өнөктөштөр менен төрт документке кол койду
XXIX Петербург эл аралык экономикалык форумунун алкагында Кыргызстандын делегациясы бир катар иш-чараларга катышып, экспорттук мүмкүнчүлүктөрдү кеңейтүүгө багытталган жаңы келишимдерди түздү. Бул тууралуу Экономика жана коммерция министрлигинен билдиришти.
Экономика жана коммерция министрлигине караштуу "Кыргыз Экспорт" борбору россиялык өнөктөштөр менен кызматташуу боюнча төрт документке кол койду.
4-июнда Санкт-Петербург соода-өнөр жай палатасы менен соода-экономикалык байланыштарды өнүктүрүү, экспортко багытталган ишканаларды колдоо жана ишкердик байланыштарды чыңдоо боюнча кызматташуу меморандуму түзүлдү.
5-июнда Россия Федерациясынын Экономикалык өнүгүү министрлигине караштуу Бүткүл россиялык тышкы соода академиясы менен тышкы соода жана экспорт тармагындагы адистерди даярдоо, ошондой эле билим берүү жана илимий долбоорлорду өнүктүрүү боюнча келишимге кол коюлду.
6-июнда "Улуттук конгресс-бюро" ассоциациясы менен конгресс-көргөзмө ишмердүүлүгү, ишкердик жана окуялык туризм тармактарында кызматташуу тууралуу меморандум түзүлдү.
Ошол эле күнү Россиянын фешен-индустриясынын катышуучуларынын ассоциациясы (РАФИ) менен жеңил өнөр жай тармагындагы кызматташууну өнүктүрүү, тажрыйба алмашуу жана өндүрүүчүлөрдүн экспорттук мүмкүнчүлүктөрүн кеңейтүү боюнча келишимге кол коюлду.
Министрликтин маалыматына ылайык, бул документтер Кыргызстандын экспорттук потенциалын жогорулатууга, жаңы өнөктөштүктөрдү түзүүгө жана эл аралык рынокторго чыгуу мүмкүнчүлүктөрүн кеңейтүүгө багытталган.
