Кыргызстан менен Кипр кош салык салууну четтетүү боюнча макулдашууга кол коюшту
Экономика жана коммерция министри Бакыт Сыдыков Кыргызстанга расмий сапар менен келген Кипр Республикасынын тышкы иштер министри Константинос Комбос менен жолугушуу өткөрдү. Бул тууралуу ведомстводон билдиришти.
Жолугушууда тараптар кыргыз-кипр кызматташтыгынын учурдагы абалын жана келечегин, ошондой эле соода-экономикалык жана инвестициялык байланыштарды кеңейтүү маселелерин талкуулашты.
Жолугушуунун жыйынтыгында Кыргыз Республикасы менен Кипр Республикасынын ортосунда киреше салыктарына карата кош салык салууну четтетүү жана салыктарды төлөөдөн качуунун алдын алуу жөнүндө макулдашууга кол коюлду.
Документтин негизги максаты — эки өлкөдө иш алып барган чарба жүргүзүүчү субъекттердин кирешелерине кош салык салууну жоюу жана бизнес жүргүзүү үчүн жагымдуу шарттарды түзүү болуп саналат.
Экономика министрлигинин маалыматына ылайык, мындай макулдашуулар түз чет өлкөлүк инвестицияларды тартуунун натыйжалуу инструменттеринин бири болуп эсептелет. Ошондой эле документ эки мамлекеттин резиденттерин дискриминациялык салык салуудан коргоого, салыктан качуунун алдын алууга жана компетенттүү органдардын ортосунда маалымат алмашууну өнүктүрүүгө багытталган.
Тараптар бул макулдашуу эки өлкөнүн ортосундагы экономикалык кызматташтыкты кеңейтүүгө жана инвестициялык байланыштарды чыңдоого өбөлгө түзөрүн белгилешти.
