Кыргызстанда аймактарды өнүктүрүүгө багытталган долбоорлор улантылат
Экономика жана коммерция министрлиги Бириккен Улуттар Уюмунун Өнүктүрүү программасы (ПРООН), Россия–ПРООН Трасттык фондунун мониторингдик миссиясы жана Россия Федерациясынын Өкмөтүнүн өкүлдөрү менен биргеликте кызматташуунун жыйынтыктарын талкуулап, мындан аркы биргелешкен иштердин негизги багыттарын аныктады.
Ведомствонун маалыматына ылайык, жолугушууда өлкөнүн аймактык өнүгүүсү, аймактарды мастер-пландоо, инвестицияларды тартуу жана экономикалык өсүштү камсыздоо маселелерине өзгөчө көңүл бурулду.
Тараптар структуралык реформаларды колдоо, сооданы жана экспорттук мүмкүнчүлүктөрдү кеңейтүү, микро, чакан жана орто бизнестин атаандаштыкка жөндөмдүүлүгүн жогорулатуу, "жашыл" экономиканы өнүктүрүү, санариптештирүү жана мамлекеттик институттарды чыңдоо багытындагы кызматташтыкты улантууга кызыкдар экенин билдиришти.
Талкуунун жүрүшүндө 2025-2030-жылдарга карата региондордогу өсүштүн таяныч чекиттерин өнүктүрүү программасын ишке ашыруу, аймактарды пландаштыруунун заманбап ыкмаларын киргизүү жана инвестиция тартуу механизмдерин өркүндөтүү маселелери каралды.
Кызматташуунун алкагында ПРООН Кант шаарын кошо алганда бир катар аймактар үчүн пилоттук мастер-пландарды иштеп чыгууга эксперттик колдоо көрсөтүүдө. Ошондой эле Өзгөн шаарында инвестициялык жана аймактык пландоонун заманбап ыкмаларын киргизүү боюнча иштер улантылып жатат.
Экономика жана коммерция министрлиги ПРООНдун жана Россия Федерациясынын өлкөнүн туруктуу өнүгүүсүнө кошкон салымын жогору баалап, биргелешкен долбоорлор аймактардын экономикалык потенциалын чыңдоого, жаңы жумуш орундарын түзүүгө жана инвестициялык мүмкүнчүлүктөрдү кеңейтүүгө өбөлгө болорун белгиледи.
Жолугушуунун жыйынтыгында тараптар кызматташууну мындан ары кеңейтүүгө жана өлкөнүн региондорун туруктуу өнүктүрүүгө багытталган жаңы демилгелерди ишке ашырууга даяр экендигин ырасташты.
