Өзгөндө суткасына 5 тонна күрүч таңгактай турган логистикалык борбор ачылды
Өзгөн районунда күрүчтү кайра иштетүү жана таңгактоо боюнча заманбап логистикалык борбор ачылып, пайдаланууга берилди. Долбоор жергиликтүү дыйкандардын өндүргөн продукциясынын сапатын жогорулатууга жана анын рыноктогу атаандаштыкка жөндөмдүүлүгүн арттырууга багытталган.
Президенттин Ош облусундагы ыйгарым укуктуу өкүлчүлүгүнүн маалыматына ылайык, логистикалык борбордун курулушу 2025-жылдын август айында башталган. Долбоорду ишке ашырууга жалпысынан 14 млн 790 миң 786 сом каражат жумшалган.
Анын ичинен 10 млн 225 миң сом Ош облусун өнүктүрүү фондунан, 2 млн 565 миң сом Өзгөн районун өнүктүрүү фондунан жана 2 млн сом жергиликтүү бюджеттен каржыланган.
Мындан тышкары, АРИСтин CASA-1000 долбоорунун алкагында 6 млн 800 миң сомго заманбап жабдуулар сатылып алынган.
Жаңы логистикалык борбор суткасына 5 тонна күрүчтү тазалап, вакуумдук таңгактоодон өткөрүүгө мүмкүнчүлүк берет. Бул өз кезегинде дыйкандарга өндүргөн күрүчүн даяр продукция катары ички жана тышкы рынокторго чыгарууга шарт түзөт.
Долбоор айыл чарба продукциясын кайра иштетүүнү өнүктүрүүгө, кошумча жумуш орундарын түзүүгө жана аймактын экономикалык потенциалын жогорулатууга өбөлгө болот.
