Кытай – Кыргызстан – Өзбекстан темир жолу долбоорун ишке ашыруу маселелери каралды
8-июнда МинКаб Төрагасынын орун басары Эрлист Акунбеков Өзбекстан Республикасынын Кыргызстандагы Атайын жана Ыйгарым укуктуу Элчиси Саидикрам Ниязходжаев менен жолукту. Бул тууралуу Айыл чарба министрлигинен билдиришти.
Маалыматка ылайык, жолугушуунун жүрүшүндө тараптар кыргыз-өзбек кызматташтыгынын актуалдуу маселелерин, анын ичинде соода-экономикалык байланыштарды өнүктүрүү, агроөнөр жай тармагындагы өз ара аракеттенүүнү чыңдоо, биргелешкен инвестициялык долбоорлорду ишке ашыруу жана аймактар аралык кызматташтыкты кеңейтүү маселелерин талкуулашты.
Мындан тышкары кыргыз-өзбек өкмөттөр аралык комиссиясынын 12-жыйынына даярдык көрүү, Өзбек-Кыргыз өнүктүрүү фондунун ишмердүүлүгү, соода инфраструктурасын өркүндөтүү жана Кытай – Кыргызстан – Өзбекстан темир жолун, ошондой эле “Камбар-Ата ГЭС-1” долбоорун ишке ашыруу маселелери каралды. Жыйынтыгында тараптар эки тараптуу кызматташтыкты мындан ары да бекемдөөгө кызыкдар экендиктерин ырасташты.
