Кыргыз-азербайжан экономикалык кызматташтыгы талкууланды
Министрлер кабинетинин төрагасынын орун басары Эрлист Акунбеков Азербайжандын Кыргызстандагы атайын жана ыйгарым укуктуу элчиси Латиф Сейфаддин оглу Гандилов менен жолугушту.
Суу ресурстары, айыл чарба жана кайра иштетүү өнөр жайы министрлигинин басма сөз кызматынын маалыматына ылайык, жолугушууда тараптар кыргыз-азербайжан кызматташтыгынын учурдагы абалын жана келечектеги багыттарын талкуулашты.
Анда соода-экономикалык, инвестициялык, агрардык жана гуманитардык тармактардагы өз ара аракеттенүүнү кеңейтүү маселелерине өзгөчө көңүл бурулду.
Министр Эрлист Акунбеков эки өлкөнүн ортосундагы кызматташтык мамлекет башчыларынын деңгээлиндеги ишенимдүү саясий диалогдун негизинде ырааттуу өнүгүп жатканын белгиледи.
Ошондой эле тараптар мурда жетишилген макулдашуулардын аткарылышын карап чыгып, кыргыз-азербайжан өнөктөштүгүн мындан ары чыңдоого жана биргелешкен демилгелерди ишке ашырууга даяр экендиктерин билдиришти.
